وا وحشتك

بسأل عليك موية المطر لمن اصب نُصّ النهار

ساعة الشمس ملت السما

وفجَّت ظلال الكون قبس

في الساعة ديك والدنيا حــــر

جات ذكرتك واسترسلت فينا الغيوم

فاحت بشاشة نسمتك برد الحشا

************** 

وا وحشتك

ناديت عليك مدينا خطوات الأمل

ومشينا في شاطي الهيام

وبنينا من الريد قصُر

واوحشتك

وكتين تسيل دمعاتي في وسادة حشاي

تنزل لهيب وتقدِّد البقى من عُمُر

***************

واوحشتك

وكتين أسافر في دواخلي وأكوس أكان ألقاك هِناك

ما أصلو سفر الروح صعب

كايساك أكان ألقاك مقر

******************

واوحشتك

سامرت في الليل النجوم ونَّسْتَها

أنا والكواكب في إجتماع

والجلسة في ضيافة القمر

********************

واوحشتك

وكتين أشيل كاس الهوى

وارشف من الكاس الفراق

ويتبدَّل الطعم اللَّذيذ

والله من الطعم الحلو ..... ساعة ابقى مُر
*******************
واوحشتك
والهفة العطشان علي موية السراب
وكتين يهرول في صحارى الإلتياع
في اللحظة ديك
حتَّى السراب ببعد وِافِر
***********
واوحشتك
وكتين هموم الدنيا تتوافد علي
تكسر ضهر حلمي البسيط تستعبدو
وتبيعو في سوق الفَقُر
***********
واوحشتك
أسمع نويح قلبي الوقف
مذهول من الشايلو القدر
ماضخَّ بعدك تاني دم
واتقفَّلت فيني الشرايين البتحمل دم هواك
شان ما ازورا عشق جديد
حتى الهوى البستنشقو لو ما بيحمل زفرتك
مابحملو ....... إلاَّ الجَبُرْ
**************
واوحشتك
وكتين يزورني النوم ثواني من العُمُر
واحلم واشوفك في المنام واقف معاي
ربَّتَّ كتف الشوق وصبَّرت الحنين
وافرح براي
واضحك وادس حلمي الجميل
واهمس سكوت
حتى السكوت خافت شديد
يازولة هوي غطِّيهو سر
*************
واوحشتك
وكتين تجوط كل الموازين والحقيقة تغيب علي
صيفي الشتا
وببرد شديد والدنيا حــر
جنِّيت وجنَّت دُنيتي
فاضت بحوري ودفَّقت
هدَّت جدار صمتي العنيد
وأنهار سروري اتوقَّفت
واختلَّ ميزان الأُمور
النيل وقف فاض البحر
************
واوحشتك
ورِّيني كيف انساك واريِّح مُهجتي
تترتَّب أفكاري وتَكِنْ
والزعزعة الجُوَّايا تسكن تستقر


ماجدولين سعد جادين
الخرطوم - السودان