وسكنتك وتر بعزف حروف إسمك
وادوزنا في دواخلي غنا
وشابيت كان أطولو سماك
وقسمتك علي رويحتي
أكان ألقاك في الخاطر
وألاقي هواك
وفتَّشتك لقيتك فيني متوسِّد
مقسَّم فيني بالحتَّة وبتشبهني
رسمت مشاعري في جواك
لمستك جوة في محلك
مكان ختيت بذور عشقك
ونبتت الأماني معاك
وحسيتك نسائم برَّدت جوفي
وكت تتزايد آهاتي
ولحظة خوفي والأحزان بكون حاسَّاك
مسربل في مسارب الروح
بتمسح وجدي بي إيديك
تزيل أشجاني بي بسمة
تزغرد فيني أفراحي
تدندن كل معاني الريد
تغني غناك
وختيتك وسام عزة
تشع أنوارو في الدنيا
تنوِّر عتمتي وتفتح
طرق ما بتنفتح لي سواك
وسكنتك حنين فيني
أكان ألقى الأمان جُوَّاك!!!
ماجدولين سعد جادين
الخرطوم - السودان
(من ديوان : عبير اللحظة 2010م)
ليست هناك تعليقات:
إرسال تعليق